上週電腦死亡事件報告

上星期六、日(八月二十五、二十六日)，一連兩日去打救我部攪鬼電腦。

事緣，上星期二晚(八月二十一日)，電腦用緊中途，突然自動Reboot，仲出現藍畫面。

其實，近一年多已經經常出現呢個情況，自己不以為然，見每次都可以開番機。所以，冇理會佢，只係驚咁樣Reboot機，怕會撞死上個月剛剛買嘅SSD(做咗Drive C)。

點知，到星期三晚又死多次，呢次成晚都開唔翻部機。直到星期四朝早，部機又可以開番。

星期四晚放工返黎，諗住朝早都可以開到機，夜晚一切正常冇事吧!

點知，又係開唔到，心諗呢次大鑊，究竟係死火牛、底板定CPU呢???

直到星期五晚都係咁樣，呢次係永遠開唔到機添。

星期五晚，放工後約老友出黎食飯。老友俾咗佢嘅舊電腦個火牛，等我試下換落我部機度，證實係未我個火牛死。

星期六一朝早起身開波拆機，點知拆完晒，想接駁電源係我果張行PCI-e嘅Display Card時，先至發現我老友果舊火牛，因為係舊款型號，唔支援PCI-e。

吹脹!!! @@

跟另一位老友商量過問題後，拿拿聲去高登，買咁呢個新火牛。

Cooler Master Silent Pro Gold 450W (官方網頁):

http://www.coolermaster.com.tw/product.php?product_id=6790

安裝完呢個新火牛，開機試過一次正常運作成功，就將部機搬番原位，接駁番所有野。

之後，一開機又係唔得。

真係吹到啤一聲!!! @@

係咁嘅情形，用Multimeter度下開關及其他接線。終於，證實問題係源自於機箱果個Power Switch瓜柴。

因為係intermittent情形，所以部機會自動Reboot。

我的舊機箱:

所以，星期日又要再去過高登，買咗呢個新機箱。

好似裝嵌新機一樣，將底板、CPU及其他野，全部由舊機箱，搬去新機箱。

終於，夜晚九點左右，工程完成。

接近一星期嘅運作，暫時再冇問題發生。

好彩!!!